ЭЗХЯ-ны дэмжлэгтэй Шинжлэх Ухааны Академиас уламжлал болгон зохион байгуулдаг “Эрдэм хакатон - 2025” тэмцээний хоёрдугаар шатны шалгаруулалт өнөөдөр Мэдээллийн технологийн үндэсний паркт эхэллээ. Энэ жилийн тэмцээнийг Шинжлэх ухааны ажилтны өдрийг тэмдэглэн өнгөрүүлэх арга хэмжээний хүрээнд “Эрдэнэт Үйлдвэр” ТӨҮГ, Стартап Монгол ТББ-тай хамтран зохион байгуулж байна.

"Эрдэм Хакатон - 2025" тэмцээн нь “Шинэ сэргэлтийн бодлого”-ын хүрээнд Монгол Улсын нийгэм эдийн засгийн хөгжилд хувь нэмэр оруулах, шинжлэх ухаанд суурилсан, цаашид үйлдвэрлэлд нэвтрэх боломжтой, оюуны өмчийн эрх бүхий инновацын төслийг шалгаруулж хөрөнгө оруулалтаар дэмжих зорилготой зохион байгуулагдаж байна.

Тус тэмцээнд эрдэм шинжилгээний байгууллага, аж ахуй нэгжийн төлөөллөөс 28 төслийн санал ирүүлснээс 15 төсөл шалгарч хоёрдугаар шат буюу эцсийн шалгаруулалтад өрсөлдөж байна. Энэ жилийн тэмцээний онцлог нь энтрэпренер судлаачид төслийн санаа дэвшүүлэн өрсөлдөх юм.