Унгар улсаас Монгол улсад суугаа элчин сайдын яамнаас Монгол Улсын Шинжлэх Ухааны Академитай хамтран 2022 оноос эхлэн “Унгар-Монголын Шинжлэх ухааны Академи хоорондын хамтын ажиллагаа” эрдэм шинжилгээний бага хурлыг олон улсын шинжлэх ухааны ажилтны өдөрт зориулан 2025 оны 11 дүгээр сарын 20-ны өдөр амжилттай зохион байгууллаа.

Унгар-Монгол хоёр улсын хооронд Дипломат харилцаа тогтоосны 75 жилийн ой, Унгарын Шинжлэх Ухааны Академи үүсгэн байгуулагдсаны 200 жилийн ой тохиож байгаа түүхт энэ жил 4 дэх удаагийн эрдэм шинжилгээний бага хурал амжилттай зохион байгуулагдаж, хоёр орны шинжлэх ухааны салбар тэр дундаа Академи хоорондын хамтын ажиллагаа жилээс жилд өргөжин тэлж байгааг тод томруунаар харууллаа.

1957 онд Унгар-Монголын соёл, шинжлэх ухааны салбарын хамтын ажиллагааны анхны хэлэлцээр байгуулагдсанаар хоёр улсын холбогдох талууд хамтарсан экспедицүүдийг зохион байгуулж эхэлсэн. Ингэснээр угсаатны зүй, археологи, хэл шинжлэл, биологи, ус, геологийн экспедицүүд 1960 оноос эхлэн зохион байгуулагдаж олон арван судалгааг амжилттай гүйцэтгэсэн байдаг.

Хурал жилээс жилд өргөжиж энэ жил 2 салбар хуралдаан болж өргөжин Унгарын талаас 7 илтгэл, Монголын талаас 8 илтгэл хэлэлцүүлэгдлээ.

Хуралд нийгэм, хүмүүнлэг, түүх, соёл, улс төр, эдийн засгийн харилцаа болон биологийн төрөл зүйл, ДНК, ургамал, эм, эмзүйн салбарын сонирхолтой судалгааны илтгэлүүд хэлэлцүүллээ.