Эрдэм шинжилгээний хурлын үеэр ФТХ-ийн захирал Ж.Даваасамбуу ФТХ-ийн Захиргааны зөвлөлийн  2026 оны 1 сарын 26-ны өдрийн шийдвэрийг үндэслэн Инновац, Технологийн салбарын “Электроник, төхөөрөмж хөгжүүлэлтийн лабораторийг зохион бүтээгч инженер эрдэмтэн Гомбын Жаргалсайхан агсны нэрэмжит болгосон тухай шийдвэрийг танилцуулсан. Түүнчлэн ФТХ-ийн II давхарт Г.Жаргалсайханы нэрэмжит буланг үр хүүхдүүдийн дэмжлэгээр тохижуулсан байна. Энэ буланд 1974-1980-иад онд Г.Жаргалсайхан агсны өөрийн хийсэн, мөн түүний удирдаж байсан ФТХ-ийн зохион бүтээх товчооны хамт олны бүтээсэн үйлдвэрийн телевизийн камерын систем, зүрхний цохилт хэмжигч, гялбалзалтын радиометр, импульсын генератор, MONEL-88 IP компьютер, хиймэл дагуулаас мэдээлэл хүлээн авагч зэрэг 15 гаруй биет төхөөрөмжийг дэлгэн үзүүлсэн нь одоо ажиллаж буй ахмад үеийнхэнд дурсамжтай, залуу судлаачдын сонирхлыг татсан үзмэр болж олны талархалыг хүлээлээ. Өнөөдөр тус хүрээлэнгийн Инновац, Технологийн салбарын “электроник, төхөөрөмж хөгжүүлэлтийн лабораторид орчин үеийн электроник, хэмжилтийн техник, ухаалаг төхөөрөмж, инженерчлэлийн чиглэлээр судалгааг үргэлжлүүлэн, үндэсний технологийн чадавхыг бэхжүүлэхэд хувь нэмэр оруулан ажиллаж байна. Цаашид энэхүү буланд ФТХ-ийн эрдэмтдийн бүтээлийн дээжээс тавьж олны хүртээл болгох болно.

Эрдэм шинжилгээний хурлын төгсгөлд ФТХ-ийн захирал Академич Ж.Даваасамбуу хүрээлэнгийн нийт эрдэмтэн судлаачдын дунд нийгэм эдийн засагт хувь нэмэр оруулахуйц, эцсийн бүтээгдэхүүн гаргах 75 сая хүртэлх төгрөгийн санхүүжилт бүхий инновацын төслийн сонгон шалгаруулалтыг зарласан. Энэ төслийн санхүүжилтийг зохион бүтээгч инженер Гомбын Жаргалсайхан агсны үр хүүхдүүд ивээн тэтгэж байгаа юм. Төслийг хэрэгжүүлснээр Монгол улсад электроник, инновац зохион бүтээлтийн өнөөгийн хөгжилд, залуу судлаачдыг хөгжүүлэхэд, инженерчлэлийн чиглэлийн судалгаанд жинтэй хувь нэмэр болно гэдэгт итгэлтэй байна. “Электроникийн салбарын ирээдүйн чиг хандлага” сэдэвт эрдэм шинжилгээний бага хурлыг амжилттай зохион байгуулахад гүн тусалцаа үзүүлсэн ахмад эрдэмтэн Гомбын Жаргалсайхан агсны үр хүүхдүүд, хамт сурч, ажиллаж байсан нөхөд шавь нарт нь, хүрээлэнгийн хамт олонд талархаж байна.